“اتجوزها في البلد عشان يرضي عمه وخدها معاه عشان تعيش في الفيلا بتاعه مع مراته الأولى على أنها بنت

ميس: تليفونك بيرن يا سليم مش سامع يعني؟
جلس سليم نصف جلسة ومسك الهاتف وفتحه ووضعه على أذنه قائلاً بنعاس:
ألو….. أيوا يا مصطفى…
مصطفى بغيظ: يا برودك يا أخي….. كمان نايم لحد دلوقتي وبابا قالب الدنيا عليك هنا.
سليم: طيب ماشي أنا هلبس وجاي أهو…
مصطفى: متتأخرش يا أخويا ولما تحب تعمل اللي إنت بتهببه دة إبقى ما تتأخرش وتيجي على البيت متباتش برة.
سليم: مصطفى حبيبي يلا سلام أشوفك بعدين.
قال ذلك ثم أغلق الهاتف بتأفف..
ميس: عاوزك ليه مصطفى؟
سليم: أبدا إتأخرت على الشغل.. ولازم أمشي دلوقتي.
نهض سليم من الفراش ثم توجه إلى الحمام وأغتسل ثم خرج وأبدل ملابسه ورحل إلى الشركة.
في شركة حامد الداغر يدلف شريكه ماجد وجلس على الأريكة إلى جواره بعد السلامات والترحيبات.
حامد: المكتب منور يا ماجد.
ماجد: منور بأهله يا حامد.. ها إيه أخبار الشغل؟
حامد: عال العال.. والانتخابات اللي داخل فيها دي واخدة كل وقتي وتفكيري.
ماجد: متقلقش أنا مكلملك أفضل شركة للدعايا بتاعتك.. أما الناس اللي هتنتخبك دى بردو سيبهالي أنا.
حامد: مش عارف أشكرك إزاى.
ماجد: ولا شكر ولا حاجة إحنا أهل ولا إيه؟
حامد: آه طبعا.. بالحق عاوزين نحدد فرح الولاد بقى.
ماجد: والله إحنا جاهزين شوفوا إنتوا تحبوه إمتى.
حامد: أنا بقول خليها أول الشهر الجاي دة ها حلو يكون نتيجة الانتخابات ظهرت علشان المناسبة تبقى إثنين إن شاء الله.
ماجد وهو كذلك: ماشي مفيش مشكلة..
خد بقى عاوز إمضتك على البضاعة دى علشان أخلي الرجالة تستلمها من المينا.
حامد وهو يمضي على الأوراق: ماشي يا سيدي إتفضل.. بس مكانش ليه لزوم تتعب نفسك كنت جبت أي حد بالورق.
ماجد: لا ما أنا كنت عاوز أشوفك ليا مدة مشفتكش فيها قولت أجي أشوفك.
حامد: فيك الخير والله.
ماجد: دلوقتي هقولك على الخطة بحكم خبرتي اللي لازم تمشي عليها علشان تضمن نجاحك في الانتخابات.
حامد: ماشي قول أنا سامعك…
في شقة ممدوح فى غرفة سميحة تجلس معها ورد تحفظها القرآن.
ورد: ها كدة حفظتها صح؟
سميحة: أيوة صح شطورة يا ورد هجبلك شيكولاتة من بتوع البهوات إبسطي يا ستى.
ورد بفرح: بجد ربنا يخليكي يا سميحة.
سميحة: ويخليكي ليا يا بنت عمتي.
ورد: هتحفظيني السورة اللي جاية إمتى علشان أعمل حسابي؟
سميحة: خليها على أول الأسبوع يا حبيبتي.
ورد: ماشي يا سمسم……
دلفت زوجة خالها تنظر لها باستحقار:
إنتي يا زفتة قاعدة عندك بتعملي إيه؟
وقفت ورد وهى تنظر للأرض بخوف:
ها….. أصل….. أصل خلصت شغلي كله والله يا مرات خالي…..
منيرة: طيب غوري إتلقحى في أوضتك لا تبوظي البت عاوزاها تجيب تقدير.
ورد بحزن: حاضر يا مرات خالي.
ذهبت ورد لغرفتها تفرغ حزنها هناك…
منيرة: ذاكري دلوقتي يا سميحة علشان بالليل شبكة شروق بنت أم عاطف جارنا.
سميحة: حاضر يا أما بس هناخد ورد معانا؟
منيرة: ورد مين وزفت مين دى هتتلقح هنا لحد ما نجي.. أنا طالعة من هنا بدل ما تعليلي الضغط.
خرجت منيرة ودلفت إلى غرفتها ووجدت ممدوح أمامه رزمة من النقود يقوم بعدها..
منيرة بفرح: إش إش إيه الفلوس دى كلها يا ممدوح شكلهم راضين عنك خالص اليومين دول.
ممدوح: وميرضوش عنى ليه دة أنا بعملهم كل اللي بيطلبوه.
منيرة: طيب يا أخويا كنت عاوزة أفاتحك في موضوع كدة.
ممدوح: موضوع إيه دة يا منيرة؟
منيرة: الزفتة بنت أختك اللي متلقحة عندنا… ما دورتش على أهلها..
ممدوح: ما أهل البت دى ناس غناي أوي ومن عيلة كبيرة في مصر بس مش معترفين بيها أصلاً.. أصل جد البت دى كان شديد وبيميز بين الغنى والفقير.. فأتبرى من ابنه لما عرف إنه ماشي مع أمها الفاجرة فساب الراجل العز والهنا علشانها.. وعاشوا مع بعض لحد ما خلفوها وبعدين ماتوا في الحادثة زي ما إنتي عارفة.
منيرة: يعني اللي جابلك البت دى مكانش وداها عندهم وإخلصنا هى ناقصة هم..
ممدوح: متقلقش هتروح لأهلها بس مش بلوشي كدة ولله وللوطن.
منيرة أومال بإيه: نورنى يا أخويا.
ممدوح: كله بأوانه يا منيرة إستنى وانتي هتعرفي..
ثم تمتم بصوت منخفض: ودة طبعا مش قبل ما أخد اللي أنا عاوزه والنهاردة فرصة من دهب.. هههههه ولا وهتقعى تحت إيدي يا ورد وشوفى مين هينجدك مني..
منيرة: بتقول حاجة يا ممدوح؟
ممدوح بانتباه: لا لا ما بقولش.. أنا نازل أشوف الرجالة تحت.
تركها ورحل فقالت منيرة: هههههه والله وهنخلص منك ومن همك يا بت نسمة….. وهنستفيد من وراكي كتير.
في قسم الشرطة يخرج مراد برفقة عمر ويذهبا إلى سيارة سليم الذي كان بانتظارهم مستنداً عليها…
عمر وهو يعانقه: أبو السواليم حبيب قلبي…..
سليم: بطل ياض الكلمة دي….. بيئة أوي.
عمر: إسم الله عليك يا تربية الشانزليزيه.
سليم وهو يسلم على مراد: والنبي قوله حاجة يا مراد بدل ما أفرمهولك هنا.
عمر: متقدرش إنت واقف في حتتنا وأي غدر منك هيجبوك من قفاك زي الحرامية.
سليم وهو يلكمه في وجهه بقوة: أديني في حتتكم أهو وريني هتعمل إيه.
عمر متألما: اااه يخرب بيتك يا سليم…..
مراد: بس إنتوا الأتنين وخلينا نمشي.
سليم: يلا بينا.
صعدوا إلى السيارة ثم انطلقوا إلى منزل عواطف.
في منزل لمار ليلاً…………
الفتاة: واو بجد إنتي تحفة وتصميمك تحفة دة زي الجاهز بالضبط.. تسلم إيدك يا لمار.
لمار: ربنا يخليكي دة بس من ذوقك يا هدير.
هدير: لا بقى دا أنا هجيب صحباتي هنا.. دة أنا لما هوريهم الفستان بتاعي هيتهبلوا عليه.
لمار: ياااه مش للدرجة دي يعني.. ماشي يا حبيبتي هستناهم.
هدير وهي تناولها النقود: طيب خدي الحساب لازم أمشي دلوقتي.
لمار: خليكي يا حبيبتي شوية.
هدير: لا لازم أمشي ماما هتقلق عليا.
لمار: ماشي يا هدير أشوفك بعدين.. سلميلي على ماما.
هدير: ماشي يوصل يا لمورة….. سلام.
لمار: سلام……..
أغلقت لمار الباب وجلست على الكرسي تنظر للمكان ببعض الخوف.
لمار: يووووه بطلي هبل يا لمار مفيش حاجة تخوف إنتي بس متهيألك مفيش عفاريت….. مفيش….. أنا أهو منورة الشقة كلها ومش هيحصل حاجة.. أنا هروح أصلي العشا وأنام علطول……
قالت ذلك ثم دلفت إلى الحمام وتوضأت ثم خرجت وفرشت المصلية ثم شرعت في الصلاة بخشوع وبعد أن انتهت من صلاتها أخذت تتلو ما تيسر من آيات الذكر الحكيم..
وبعد أن انتهت دلفت لغرفة نومها وخلعت حجابها وتمددت علي السرير وأندست في الغطاء من رأسها لأخمص قدميها ثم أخذت تقرأ أذكارها وما انتهت أخذت تسرح بخيالها فى حياتها في الماضي وما هي عليه الآن.
في شقة ممدوح………
منيرة: يلا يا سميحة علشان نمشي بلاش لكاعة.
سميحة: حاضر يا أما حاضر.
تقدمت ورد من منيرة بخوف قائلة:
آآ…. مرات خالي ممكن…. ممكن أروح معاكي.. خديني معاكي والنبي…..
منيرة: نعم يا روح أمك.. بت إنتي مش ناقصالك ع المسا.
ورد بخوف: خديني وهقعد في الأوضة بس ومش هطلع إلا لما الشبكة تخلص وممكن كمان أخدم هناك في المطبخ أعمل أي حاجة بس بلاش تسيبني هنا لوحدي…..
منيرة: ليه العفريت هياكلك يا أختي.. أنا قيلها كلمة ومش هكررها.. غوري إترزعي في أوضتك.
ورد بقلة حيلة: حاضر يا مرات خالي حاضر.
توجهت إلى غرفتها وأغلقت الباب بالمفتاح ثم جلست خلف الباب وهي تبكي بخوف من أن يأتي خالها مستغلاً غياب زوجته وابنته وينفذ تهديده الذي أخبره إياها صراحة…..
ورد بدموع: أنا أهو قفلت الباب ومش هفتحه لحد ما سميحة ومرات خالي تيجي.
في الأسفل خارج الشقة تماماً في الشارع وتحديداً على القهوة يجلس ممدوح وهو يشرب سجائر بها مخدرات…..
سطوحي: إيه يا عم شايفك مبسوط النهارده ولا دة مفعول الحشيش.. هههههه.
ممدوح: هههههه لا أصل النهارده هحقق هدفي اللي من زمان وأنا عاوز أعمله.
سطوحي: هدف إيه دة؟
ممدوح: أنى أجيب مجموع الطب يا خفيف ههههه…
سطوحي: هههههه.. إيه دة دة الحشيش إشتغل… إشرب يا أخويا إشرب.
وصل سليم والبقية إلى وجهتهم دلفوا في الحي الذي تقطن فيه عواطف وركنوا السيارة ونزلوا منها في طريقهم لبيتها..
أخذ الجميع يتطلع إليهم بانبهار فهم عادة لا يرون مثل هؤلاء..
وصلوا أخيراً أمام المنزل………
سليم: مراد قبل ما ندخل بلاش تهور ماشي؟
مراد ببرود: ربك يسهل.
عمر: خبط.. خبط يا سليم وربنا يستر.
طرق سليم الباب وبعد ثواني معدودة أتاه الرد من الداخل.
عواطف: أيوا يا اللي بتخبط أديني جاية.
ذهبت وفتحت الباب وصدمت مما رأت…..
مراد بغضب مكتوم: دى شقة عواطف حسين؟
عواطف بتوتر: آآآ…. أيوة…. أيوةاا يا بيه خير في حاجة؟
تخطاها مراد ودلف إلى الداخل وأتبعه سليم وعمر.
عواطف: يا بيه إنتوا مين وعاوزين إيه مينفعش تدخلوا هنا أنا لوحدي وما يصحش.
ذهب مراد ناحية الباب وأغلقه فدب الخوف بداخلها.
مراد بهدوء مميت: إقعدي هما كلمتين ورد غطاهم.
عواطف: حاضر يا باشا.. تحت أمرك.
مراد: فين عابدين ومحسن……
عواطف: عابدين ومحسن؟
مراد: آه عابدين ومحسن.. ها هما فين بقى؟
عواطف ممم….. ما أعرفش يا بيه وبتسألوا عنه ليه؟
مراد بصياح غاضب: نعم يا روح أمك.. بقولك إيه لو منطقتيش بالذوق وقلتي هما فين مهخليش الشمس تطلع عليكي.
عمر متتدخلاً: إهدى يا مراد مش كدة.. بصي يا ست إنتي إحنا بوليس فأحسنلك كدة تقري وتعترفي بمكان جوزك وابنك.
عواطف بخوف: والله يا بيه ما أعرف مكانهم صدقني.
مراد ممسكاً إياها من رقبتها محاولاً تهدئتها:
لا ما إنتي هتعترفي يعني هتعترفي.. إنطقي هما فين هما فين؟
تدخل سليم وعمر وأبعدا مراد عن عواطف.. التي سعلت بقوة…..
مراد: أوعى يا سليم خليني أتفاهم معاها.. ها هتقولي ولا….
عواطف بخوف: كح كح….. آآ خلاص يا باشا هقول.
مراد: إتفضلي أنا سامعك أهو.
عواطف بخبث ودموع تماسيح:
ابني مالوش ذنب يا بيه صدقني أبوه هو اللي غواه وخلاه يمشي في الطريق دي.
مراد: إنتى هتحكيلى تاريخ حياتكوا الوسخ دة إخلصي إنطقي…………..
عواطف مواصلة كذبها: أنا مليش علاقة بعابدين يا بيه دا أنا حتى لما عرفت اللي عمله بقيت عايشة لوحدها هنا وهو كان ساكن مع بنته يا بيه وضحك على ابني الغلبان ووقعوه في شر أعماله هو واللي ما تتسمى بنته.
مراد بإستغراب: بنته هو معاه بنت؟
عواطف: أيوا يا بيه بنت أستغفر الله العظيم يا باشا اللهم إستر على ولايانا.. وهى متورطة في كل صغيرة وكبيرة يا بيه مع أبوها.. وعاملة نفسها شيخة يا بيه وقال إيه معاها مكنة قماش وبتخيط عليها علشان تداري اللي بتعمله ولو مش مصدقني يا باشا أنا روحتلها من فترة علشان أطمن عليها ودخلت جوة أوضة نوم أمها أريحلي.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”




